Höfundurinn

Hjalti Halldórsson

Hjalti Halldórsson (f. 1980) er grunnskólakennari og hefur starfað við kennslu á mið- og unglingastigi í grunnskóla frá árinu 2005. Í dag er hann starfandi sem samfélagsfræðikennari á unglingastigi í Langholtsskóla í Reykjavík en vann áður í Salaskóla í Kópavogi. Hann er með BA próf í sagnfræði og kennsluréttindi frá Háskóla Íslands en lagði einnig stund á mannfræðinám.

Stundum þegar Hjalti var að kenna lenti hann í því, alveg óvart að láta nemendur sína afvegaleiða sig og byrja að segja sögur. Þá gat hann látið dæluna ganga tímunum saman þar til annað hvort bjallan hringdi eða nemendur bentu honum á að þetta væri orðið gott og tími til kominn að fara að læra eitthvað. Þess vegna ákvað Hjalti að skrifa frekar sögurnar niður og nýta tímann betur í skólastofunni. Og hann hefur staðið við það… svona oftast nær… alla vega stundum.

Hans fyrsta og hingað til eina bók heitir Af hverju ég? og fjallar um Egil Grímsson, ungan dreng í Borgarnesi sem á ekki sjö dagana sæla. Bókina hefði hann ekki getað skrifað án strákanna sinna tveggja sem segja honum þó líka af og til að það sé komið gott af sögurausi og tími til kominn að fara út í fótbolta.

Útgefið efni

“Illskan holdi klædd.” Bókarýni. Börn og menning. 2017.

“Flateyjarbréfin.” Vinnubók. Námsefni gefið út af Námsgagnaveitunni 123skóli.

“Allt um Ólympíuleikana.” Lestextar og verkefnablöð. Námsefni gefið út af Námsgagnaveitunni 123skóli.

“Af spjöldum sögunnar.” Lestextar og verkefnablöð. Námsefni gefið út af Námsgagnaveitunni 123skóli.

Kennsluefni og lestextar með smásögunni Stjarnan í Óríon. Gefin út í tilefni dags barnabókarinnar 2017.